محمد ظاهر‌اغبر، سفیر دولت پیشین افغانستان در تاجیکستان، که خود را «سرپرست نمایندگی سیاسی مردم افغانستان» در آن کشور معرفی می‌کند، در واکنش به برخی از گزارش‌ها مبنی بر «اعزام دیپلمات طالبان به تاجیکستان» گفت که چنین اخباری درست نیست.
او در گفتگویی با خبرنگاران تاکید کرد که «نمایندگی سیاسی مردم افغانستان اموال قومی، تنظیمی (حزب) و یا سازمانی سیاسی نبوده، بلکه امانت مردم افغانستان است که او و تیم همکارانش مسئولیت حفاظت آن را بر دوش دارند.»
آقای ظاهر‌اغبر افزود که حکومت طالبان «مشروعیتی» ندارد و افزود که دیپلمات‌های نمایندگی در دوشنبه به مردم افغانستان «اطمینان» می‌دهند که تا «آمدن یک حکومت مشروع در افغانستان از این امانت حفاظت می‌کنند.»
در روزهای اخیر برخی رسانه‌ها در افغانستان به نقل از منابعی اعلام کردند که وزارت خارجه حکومت طالبان طی نامه‌ای فردی به نام «فیض‌الله» را به عنوان «دبیر اول» سفارت آن کشور در تاجیکستان تعیین کرده است.
