وزارت خارجه استرالیا اعلام کرد که این کشور ۲۰ میلیون دالر به افغانستان کمک خواهد کرد.
این وزارت روز شنبه، ۲۵ قوس، با نشر اعلامیه‌ای گفته که این پول به مردم و مهاجران اهل افغانستان در کشورهای همسایه اختصاص داده شده‌است.
استرالیا در نشست جهانی جینوا، متعهد به ارایه ۲۶۵ میلیون دالر کمک برای پناهنده‌گان در سراسر جهان از جمله آوارگان روهینگیا و جوامع نیازمند در میانمار و بنگلادش شده است.
پیش از این حکومت کانادا اعلام کرده بود که برای حمایت از افغان‌هایی که به پاکستان و کشورهای آسیای میانه مهاجر شده‌اند، ۲۱ میلیون دالر کانادایی اختصاص داده است.
سازمان بین‌المللی مهاجرت گفته است که از این کمک مالی کانادا برای کمک با مهاجران اهل افغانستان در پاکستان، قزاقستان، تاجیکستان، ترکمنستان و اوزبیکستان استفاده خواهد شد.
