یازدهمین گفت‌وگوهای سالانه تحت عنوان «گفت‌وگوهای امنیتی هرات» در دوشنبه، پایتخت تاجیکستان امروز (دوشنبه، ۶ قوس) آغاز شد.
«بازخوانی افغانستان: راهکارهای متفاوت» موضوع این نشست دوروزه است. انستیتوت مطالعات استراتژیک افغانستان برگزارکننده‌ی این نشست است.
اشتراک‌کنندگان این نشست هم عمدتا سیاست‌مداران مخالف طالبان، کارشناسان، سیاست‌مداران و نمایندگان برخی از کشورها اند.
رنگین دادفر سپنتا، رییس بورد مشورتی انستیتوت مطالعات استراتژیک افغانستان و وزیر امور خارجه‌ی پیشین در افتتاحیه‌ی کنفرانس امنیتی هرات سخنرانی کرده و گفته است که از فروپاشی کشور دو سال و سه ماه می‌گذرد.
به‌گفته‌ی او، در این مدت ده‌ها هزار شهروند تحصیل‌کرده و آموزش‌دیده مجبور به فرار از کشور شده‌اند و هزاران نفر از زنان و مردان افغانستان به زندان‌ها انداخته شده و شکنجه شده‌اند.
