شرکت برق‌رسانی افغانستان (برشنا) که اکنون توسط طالبان مدیریت می‌شود، می‌گوید که ۶۲۷ میلیون دالر بدهی خود از کشورهای همسایه را که از دوران حکومت پیشین باقی‌مانده بود، پرداخت کرده است.
حکمت‌الله میوندی، سخن‌گوی برشنا امروز (سه‌شنبه، ۱۷ دلو) این خبر را اعلام کرده است.
او می‌گوید که پس از حاکمیت طالبان، بدهی باقی‌مانده‌ی حکومت پیشین از بابت برق از کشورهای همسایه، برشنا را با مشکل جدی مواجه کرده بود، اما این شرکت علی‌رغم تحریم‌های بانکی و اقتصادی توانسته است که ۶۲۷ میلیون دالر بدهی را به چهار کشور همسایه پرداخت کند.
افغانستان در حال حاضر از کشورهای ازبیکستان، ترکمنستان، تاجیکستان و ایران برق وارد می‌کند.
