امام علی رحمان، رییس جمهور تاجیکستان، روز دوشنبه، ۲۰ جدی، در نشست ویژه سازمان پیمان امنیت جمعی پیشنهاد کرده است که یک کمربند امنیتی در اطراف افغانستان ایجاد شود. این نشست به ریاست نیکول پاشینیان، نخست وزیر جمهوری ارمنستان و رییس شورای امنیت جمعی سازمان پیمان امنیت جمعی با محوریت وضعیت قزاقستان برگزار شده بود.
رهبران روسیه، تاجیکستان، بلاروس، قزاقستان و قرقیزستان در این نشست مجازی شرکت کرده بودند.
رییس جمهور تاجیکستان در این نشست گفته است که بیش از شش هزار «جنگ‌جو» در نزدیکی مرزهای جنوبی سازمان پیمان امنیت جمعی در شمال‌شرق افغانستان مستقر هستند.
او گفته است: «به طور کلی، بر اساس اطلاعات تاجیکستان، بیش از ۴۰ اردوگاه و مرکز آموزش تروریست‌ها (طالبان) در ولایت‌های شمال‌شرقی افغانستان وجود دارد که بیش از شش هزار شبه نظامی را در خود جای داده است.»
امام‌علی رحمان هم‌چنان گفته است که وضعیت در مرز تاجیکستان و افغانستان هر روز پیچیده‌تر می‌شود و درگیری‌های درونی طالبان درست در امتداد مرز رخ می‌دهد. به گفته رییس جمهوری تاجیکستان، هفته گذشته بیش از ۱۱ نیروی طالبان در اثر درگیری بین خودی در نزدیکی مرز کشته و ۱۸ تن دیگر زخمی شده‌اند.
با این حال، او پیشنهاد داده است که یک کمربند امنیتی در اطراف افغانستان ایجاد شود.
طالبان تاکنون درباره اظهارات امام‌علی رحمان چیزی نگفته‌اند.
