فرماندهی مرکزی امریکا، سنتکام می‌گوید هواپیماها و چرخبال‌هایی که در زمان سقوط حکومت پیشین افغانستان به تاجیکستان منتقل شد، ممکن است به آن کشور واگذار شود.
جنرال مایکل کوریلا در سفر به دوشنبه گفت که این وسایط قطعا به افغانستان بازگردانده نخواهند شد زیرا مربوط به طالبان نمی‌شود.
به گزارش خبرگزاری رویترز این جنرال امریکایی گفته که امریکا تصمیم دارد شماری یا همه این هواپیماها را در اختیار تاجیکستان قرار دهد.
جنرال کوریلا افزود: هدف ما این است که بتوانیم برخی یا همه هواپیماها را به حکومت تاجیکستان واگذار کنیم. من جدول زمانی که چه وقت این اتفاق خواهد افتاد را ندارم اما سخت تلاش می‌کنیم تا این کار را انجام دهیم.
این جنرال امریکایی از نیروهای مسلح تاجیکستان به‌خاطر نگهداری از این هواپیماها قدردانی کرده است. او گفته که با دولت تاجیکستان در مورد استفاده موثر و نگهداری از این هواپیماها همکاری می‌کند.
هنگام سقوط افغانستان به‌دست طالبان در اواسط ماه آگست سال گذشته، پیلوت‌های افغان که از سوی امریکا آموزش دیده بودند، برای نجات جان خود با ده‌ها هواپیما و هلیکوپتر ارتش پیشین افغانستان به تاجیکستان و ازبکستان فرار کردند.
طالبان از این دو کشور خواسته است که این هواپیماها را به افغانستان برگردانند.
